تقارير

فساد الأحزاب وتخبط الحكومة حالت دون تعيين الأطباء الخريجين

تقارير / وكالة انباء عين العراق الدولية المستقلة

احدى رسائل الاطباء الخريجين من كلية الطب كتبها بصورة اللهجة الدارجة لكي تصل الى مسامع وأنظار الحكومة لعلهم يفقهون كون أغلبهم بلا شهادات ويتحكمون بادارة البلد من الاحزاب والمتنفذين ولازالت كصكوصة السيد وتزكية الاحزاب وقرارات مجمدة بيد من لايعرف سوى انه تسنم منصب لمنافعه الشخصية فقط وادناه نصها

سلام عليكم
اعرفكم بنفسي انا طبيب متخرج صارلي سنه كاعد بالبيت داومت باغلب المستشفيات الحكوميه خلال هالسنه مجاني وعلى حسابي الشخصي كتعليم الي وتمشيت مرضى ولكن انا كخريج نينوى خسرت سنه واكو خسر سنتين او ثلاثة من خلف عصابات داعش الارهابي وخسرنا اهلنا وناسنا وتضررنا بكلشي
نجي هسه للفساد الي حاصل ما راح اختصر الشي الي صار حتى الكل يفتهم شديصير واتمنى توصلون صوتي للكل كزميل الكم واعرف بيكم ماتقصرون
طبعا كل سنه يجي تعيين الاطباء وبقية المهن الصحيه نفس الوقت بشهر الثاني نقدم وبالرابع نباشر
هالسنه وقفو كلشي بحجة الموازنه وهو اصلا الموازنه مالها دخل وفلوس الاطباء مال سنه كامله تعادل ٢٥ مليون دولار لكل الاختصاصات وهالشي حسب كلام منهم تعادل ثمن تبديل ستائر بالمجلس
هسه الوضع بالعراق اصابة اغلب الكوادر. الطبيه والصحيه وتسكيت اعلامي فضييع وصلت لحد التهديد بالكوادر الدوام غصب حتى الاطباء المصابين تداوم او عقوبات زين سوال طبيب مصاب بكورونا شون يخلوه يداوم رغم مرضه وبالتهديد !!!! والعالم ساكته
وعدهم ٢٢٠٠ طبيب خريج كاعد بالبيت
اكثر من مرة طلبو تطوعي بس الاغلبيه ماعدهم امكانيه يداومون تطوعي
نجي للشي الي سويناه (المتخرجين)
ناشدنا رئيس نقابه اطباء العراق المحترم دكتور عبد الامير
ناشدنا وزير الصحة الحالي
قدمنا بيان لرئيس البرلمان العراقي استاذ محمد الحلبوسي
قدمنا بيان لرئيس الوزراء العراقي الكاظمي
قدمنا بيان لرئيس الجمهوريه المحترم برهم صالح
وكلها توقعت
زين شنو السبب الي وقف تعيينا
الكليات الاهليه انتشرت مال طب الاسنان والصيدله وصار فائض واحنا مالنا دخل بيها كاطباء
لم يقبلو تعيين خريجي الكليات الاهليه بسبب الاعداد الهائله والاستهتار بقدسيه هذه الكليات المحترمة فتأذت الكليات الاهليه فبالتالي رفضت الاحزاب تعيين الخريجين الجدد وهم بامس الحاجة لنا بوضع كورونا
للعلم خارج العراق عينو حتى طلاب السادس الي بعد ماتخرجو حفاظا ع سلامة الناس ونقص الكوادر
نجي اخر شي اكول الطب ست سنوات وصارت سبعة وثمانيه وتسعه للبعض بسبب داعش
كعدونا سنه ظلم بلا تعيين وهو حق مكفول من الدستور
العراقي لسنه ٢٠٠٠
ورانا اربع سنين نخدم ودراسات
وبعدها اختصاص تتراوح بين ال٣-٦ سنوات
وكل هاي تعب بتعب ورواتب قليله وبدون اعاشه تليق بالطبيب او بقيت الكوادر
وهسه رغم النقص مايعينون احد بينا ويطلبون من الشعب يساندون الكوادر الطبيه تطوعي زين ليش عندك ٢٢٠٠ خريج كاعد بالبيت عينوهم مو حقهم الدستوري وفوكاها حاجبين وثائقنا الي هي حقنا نستلمها اول ما نتخرج
لايرحمون ولا يخلون رحمه الله تنزل

اظهر المزيد

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى
إغلاق
إغلاق